ސްޓެލްކޯގެ ހަރަދުގައި ހައްޖާއި އުމުރާއަށް ފޮނުވާނެ މުވައްޒަފުން ހޮވައިފި އެވެ.
ހައްޖާއި އުމުރާގެ އަޅުކަން އަދާ ކުރުމަށް ސްޓެލްކޯގެ ހަރަދުގައި ފޮނުވާނެ މުވައްޒަފުން ހޮވާފައިވަނީ ގުރުއަތު ނަގައިގެންނެވެ. މި ގުރުއަތު ނަގާފައިވަނީ ސްޓެލްކޯއިން ބޭއްވި ހާއްސަ ރަސްމިއްޔާތެއްގަ އެވެ.
މި ރަސްމިއްޔާތަކީ އެ ކުންފުނިން ދޭ ހައްޖު އަދި އުމްރާގެ ފުރުސަތަށް ގުރުއަތު ނެގުމަށާއި، ރަމަޟާން މަސް އިހްޔާ ކުރުމުގެ އިތުރުން ސްޓެލްކޯއަށް ގިނަ ދުވަހު ހިދުމަތްކޮށްދީފައިވާ މުވައްޒަފެއް ކަމަށްވާ ޖެނެރަލް މެނޭޖަރު ހަސަން ހުސައިން ރިޓަޔާ ކުރުމާ ގުޅިގެން ރޭ ބޭއްވި ހާއްސަ ރަސްމިއްޔާތެކެވެ.
ހައްޖާއި އުމުރާގެ އަޅުކަން އަދާކުރުމަށް އަންހެން އަދި ފިރިހެން މުވައްޒަފުންނަށްވެސް ވަނީ ހުޅުވާލާފަ އެވެ. އެގޮތުން ހައްޖުގެ އަޅުކަން އަދާ ކުރުމަށް 116 މުވައްޒަފުން ވަނީ ހުށަހަޅާފަ އެވެ. އޭގެތެރެއިން ޝަރުތު ހަމަވެފައިވަނީ 98 މުވައްޒަފުންނެވެ. އަދި އުމްރާގެ އަޅުކަން އަދާކުރުމަށް 263 މުވައްޒަފަކު ހުށަހެޅި އެވެ. އުމްރާގެ ދަތުރަށް ޝަރުތު ހަމަވީ 254 މުވައްޒަފުންނެވެ.
އެހެން އަހަރުތަކުގައި ސްޓެލްކޯގެ ހަރަދުގައި ހައްޖާއި އުމްރާއަށް ފޮނުވަނީ ކޮންމެ އަޅުކަމަށް 2 މުވައްޒަފުންނެވެ. އެއީ އަންހެން އެއް މުވައްޒަފަކާއި ފިރިހެން އެއް މުވައްޒަފެކެވެ. ނަމަވެސް މިއަހަރު އެ ސިޔާސަތަށް ގެނައި ބަދަލަކާއި އެކު ކޮންމެ އަޅުކަމަށް ތިން މުވައްޒަފުން ފޮނުވާނެ އެވެ. އެއީ އަންހެން މުވައްޒަފަކާއި ފިރިހެން ދެ މުވައްޒަފުންނެވެ.
ހައްޖަށް ދިއުމަށް ފުރުސަތު ލިބުނު މުވައްޒަފުން
- އަބްދުﷲ އާމިރު – ހުޅުމާލެ އިންޖީނުގެ
- މުހައްމަދު އާދިލް – ކ. ކާށިދޫ އިންޖީނުގެ
- އައިޝަތު ޝިޒްނާ – ވިލިނގިލި އަވަށު އިންޖީނުގެ
އުމުރާއަށް ދިއުމަށް ފުރުސަތު ލިބުނު މުވައްޒަފުން
- އާޒިމް އާދަމް – އދ. ދަނގެތި އިންޖީނުގެ
- މުހައްމަދު އާރިފް – ރިނިއުވަބަލް އެނާޖީ ޑިޕާޓްމަންޓް
- ހަދީޖާ އިފްޝާ – ފައިނޭންސް އެންޑް އެކައުންޓްސް ޑިޕާޓްމަންޓް
ސްޓެލްކޯގެ ހަރަދުގައި ހައްޖުގެ އަޅުކަން އަދާކުރުމަށް ފުރުސަތު ދެނީ އެ ކުންފުނީގައި 15 އަހަރަށް ވުރެ ގިނައިން ހިދުމަތްކޮށް ހިދުމަތުގައި ދެމިތިބި މުވައްޒަފުންގެ ތެރެއިން އެކަމަށް ކުރިމަތިލާ މުވައްޒަފުންނަށެވެ. އުމުރާގެ އަޅުކަން އަދާ ކުރުމަށް ފުރުސަތު ދެނީ އެ ކުންފުނީގައި 5 އަހަރަށް ވުރެ ގިނަ ދުވަހު އެ ކުންފުނީގައި މަސައްކަތް ކޮށްފައިވާ މުވައްޒަފުންގެ ތެރެއިން އެކަމަށް ކުރިމަތިލާ މުވައްޒަފުންނަށެވެ.
