ބްރެޒިލަށް އެންމެފަހުގެ ކޮޕާ އެމެރިކާ ފުޓްބޯޅަ މުބާރާތް ކާމިޔާބުކޮށްދިން ކެޕްޓަން ޑެނީ އަލްވޭސް އެ ގައުމުގެ ކްލަބެއްކަމަށްވާ ސައޮ ޕައޮލޯ އަށް ބަދަލުވެއްޖެއެވެ.

ފަހުގެ މީޑިއާ ރިޕޯޓްތައް ބުނާގޮތުން، ސައޮ ޕައޮލޯއާ އެކު އަލްވޭސް ވަނީ 2022 ވަނަ އަހަރުގެ ވޯލްޑްކަޕްގެ ނިޔަލަށް މަޑުކުރުމަށް އެއްބަސްވެފައެވެ.

އުމުރުން 36 އަހަރުގެ އިތުބާރު ފުލްބެކް އަލްވޭސް އެންމެފަހުން ކުޅުނީ ފްރާންސްގެ ޗެމްޕިއަން ޕީއެސްޖީއަށެވެ. މިދިޔަ ސީޒަނަށް ފަހު އެ ޓީމާއެކު ހަދާފައިވާ އެއްބަސްވުން ހަމަވުމުން ކްލަބެއް ނެތި ހުރި އަލްވޭސް ވަނީ ސްޕެއިނުގެ ސެވިއްޔާ އާއި ބާސެލޯނާގެ އިތުރުން އިޓަލީގެ ޔުވެންޓަސް އަށް ވެސް ކުޅެފައެވެ.

ބްރެޒިލްގެ ގައުމީ ޓީމަށް 114 މެޗު ކުޅެދީފައިވާ އަލްވޭސްގެ ޕްރޮފެޝަނަލް ކެރިއަރުގައި މިހާތަނަށް 40 ތަށި ހަމަކޮށްފައިވާއިރު، އޭނާގެ ކްލަބު ކެރިއަރުގެ އެންމެ ކާމިޔާބު ދުވަސްތައް ހޭދަކުރީ ބާސެލޯނާގައެވެ. އެ ޓީމާއެކު 23 މުބާރާތެއްގެ ތަށި ހޯދާފައިވާއިރު، އެންމެ ފާހަގަކޮށްލެވޭ ކާމިޔާބީތަކުގެ ތެރޭގައި، ތިން ފަހަރު ޔުއެފާ ޗެމްޕިއަންސް ލީގު އަދި ހަ ފަހަރު ސްޕެނިޝް ލަލީގާ ހޯދާފައިވެއެވެ.

އޭގެކުރީން، ސެވިއްޔާގައި ހޯދީ ކާމިޔާބީތަކަށް ބަލާއިރު، ސްޕެނިޝް ސުޕަ ކަޕް ސްޕެނިޝް ކަޕް އަދި ޔުއެފާ ކަޕް ތިން ފަހަރު ހޯދާފައިވެއެވެ.

އަލްވޭސް އެންމެފަހުން ކުޅުނު ޕީއެސްޖީއާއެކު ފްރެންޗް ލީގާއި ފްރެންޗް ސުޕަ ކަޕް ދެފަހަރު ހޯދިއިރު ފްރެންޗް ކަޕް އެއްފަހަރު ހޯދާފައިވެއެވެ. އޭނާ ވަނީ ޔުވެންޓަސް އާއެކު އިޓާލިއަން ސެރިއޭގެ އިތުރުން އިޓާލިއަން ކަޕްވެސް ކާމިޔާބުކޮށްފައެވެ.

ސައޮ ޕައޮލޯގައި އަލްވޭސް ބޭނުންކުރުމަށް ހަމަޖެހިފައިވަނީ 10 ނަންބަރު ޖާޒީއެވެ.

0
0
0
0
0

މިލިޔުމާއި ގުޅޭ

ކޮމެންޓް

Your email address will not be published.