މާތްﷲ އިންސާނުން ދުނިޔެއަށް ފޮނިއްވީ އެކަލާނގެއަށް އަޅުކަން ކުރުމަށާއި އިސްލާމްދީން މަތިވެރިކޮށް އެދީނަށް ނަސްރު ދިނުމަށެވެ. އަދި ކުށްފާފަތަކުން އެއްފަރާތްވެ ހުރެ އުހުރަވީ ހަޔާތުގެ ފޮނި މީރުކަން ހޯދުމަށް މަސައްކަތް ކުރުމަށެވެ. މާތް ﷲ އިންސާނުންގެ ތެރެއިންވެސް ނަފްރަތުކުރައްވާ ބާވަތުގެ އިންސާނުންވެއެވެ. އަދި އެބައެއްދެކެ މާތްﷲ ލޯބިވެވޮޑިގަންނަވާ އިންސާނުންވެސް މި ދުނިޔެމަތީގައިވެއެވެ. އެފަދަ އިންސާނުން ކުށްތަކަށް އަރައިގަތުމަށް ބިރުގަންނާނެއެވެ. އަދި އެއީ ހެޔޮކަންކަން ކުޅަ އިންސާނުންނެވެ. އެގޮތުން މާތް ﷲ ސުބްހާނަހޫ ވަތަޢާލާ ލޯބިވެވޮޑިގަންނަވާ އަށް ވައްތަރެއްގެ މީހުން ތިރީގައި އެވަނީއެވެ.
ޢަދުލަށް ޙުކުމްކުރާ މީހުން
މާތް ﷲ ވަޙީ ކުރެއްވިއެވެ. ”إِنَّ اللَّـهَ يُحِبُّ الْمُقْسِطِينَ“ سورة المائدة 42
މާނައީ: ހަމަކަށަވަރުން ޢަދުލަށް ޙުކުމްކުރާމީހުން ދެކެ ﷲ ލޯބިވެވޮޑިގަންނަވައެވެ.
އިޙްސާންތެރީން
މާތް ﷲ ވަޙީ ކުރެއްވިއެވެ. ”وَأَحْسِنُوا ۛ إِنَّ اللَّـهَ يُحِبُّ الْمُحْسِنِينَ“ سورة البقرة 195
މާނައީ: ތިޔަބައިމީހުން .އިޙުސާންތެރިވާށެވެ. ހަމަކަށަވަރުން އިޙުސާންތެރިން ދެކެ ﷲ ލޯބިވެވޯޑިގަންނަވައެވެ.
ޠާހިރުވާމީހުން
މާތް ﷲ ވަޙީ ކުރެއްވިއެވެ. ”وَيُحِبُّ الْمُتَطَهِّرِينَ“ سورة البقرة 222
މާނައީ: އަދި ޠާހިރުވާމީހުން ދެކެވެސް އެކަލާނގެ ލޯބިވެވޮޑިގަންނަވައެވެ.
ގިނަގިނައިން ތައުބާވާ މީހުން
މާތް ﷲ ވަޙީ ކުރެއްވިއެވެ. ”إِنَّ اللَّـهَ يُحِبُّ التَّوَّابِينَ“ سورة البقرة 222
މާނައީ: ހަމަކަށަވަރުން ގިނަގިނައިން ތައުބާވާ މީހުންދެކެ ﷲ ލޯބިވެވޮޑިގަންނަވައެވެ.
ތަޤްވާވެރިން
މާތް ﷲ ވަޙީ ކުރެއްވިއެވެ. ”فَإِنَّ اللَّـهَ يُحِبُّ الْمُتَّقِينَ“ سورة آل عمران 76
މާނައީ: ފަހެ ހަމަކަށަވަރުން ތަޤްވާވެރިންދެކެ ﷲ ލޯވިވެވޮޑިގަންނަވައެވެ.
ކެތްތެރީން
މާތް ﷲ ވަޙީ ކުރެއްވިއެވެ. ”وَاللَّـهُ يُحِبُّ الصَّابِرِينَ“ سورة آل عمران 146
މާނައީ: ކެތްތެރީންދެކެ ﷲ ލޯބިވެވޮޑިގަންނަވައެވެ.
ﷲގެ މަގުގައި ހަނގުރާމަކުރާ މީހުން
”إِنَّ اللَّـهَ يُحِبُّ الَّذِينَ يُقَاتِلُونَ فِي سَبِيلِهِ صَفًّا كَأَنَّهُم بُنْيَانٌ مَّرْصُوصٌ“
މާނައީ: ހަމަކަށަވަރުން، ހަރުދަނާ ބިނާއެއް ފަދައިން ސަފުސަފަށް އެތުރިގެންތިބެ، އެކަލާނގެ މަގުގައި ހަނގުރާމަކުރާ މީހުންދެކެ، اللَّه ލޯބިވެވޮޑިގަންނަވައެވެ.
ﷲއަށް ވަކީލުކުރާ މީހުން
މާތް ﷲ ވަޙީ ކުރެއްވިއެވެ. “إِنَّ اللَّـهَ يُحِبُّ الْمُتَوَكِّلِينَ“ سورة آل عمران 159
މާނައީ: ވަކީލުކުރާމީހުން ދެކެ ﷲ ލޯބިވެވޮޑިގަންނަވައެވެ.
