މިއަދު އަވަހާރަވި ނިޝާން އިއްޒުއްދީންގެ އިއްޒަތުގެ ވެރިޔާ އަލްމަރުހޫމް އުމަރު ޒާހިރަކީ ޒަމާނީ ދިވެހިރާއްޖޭގެ ހިއްސާދާރެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އުމަރު ޒާހިރު އަވަހާރަވުމާއި ގުޅިގެން ކުރެއްވި ޓުވީޓެއްގައި ރައީސް ނަޝީދު ވިދާޅުވީ އުމަރު ޒާހިރަކީ ޒަމާނީ ދިވެހިރާއްޖެ ބިނާކުރުމުގައި އެންމެ އިސް ދައުރެއް އަދާކުރެއްވި ހިއްސާދާރެއް ކަމަށެވެ. އަސި އިޖްތިމާއީ، އިގްތިސޯދީ އަދި ސިޔާސީ ކަންކަމުގައި ވެސް އެމަނިކުފާނުގެ ބަިއވެރިވުން ބޮޑު ކަމުގައި ވިދާޅުވިއެވެ.
Hon.Umar Zahir(N.I.I.V) akee zamaanee Dhivehi Raajje binaakurumuge enme is dhaureh adhakurevvi hissadhareh.Ijthimaee,igthisoadhee adhi siyaasee kankamugaves e manikfaanuge baiverivun ehaame bodu.Maaiy Allah marhoom ah suvaruge minvarukuravva,aailaa ah kehtherikan dhevvashi.Aameen
— Mohamed Nasheed (@MohamedNasheed) December 20, 2021
އުމުރުފުޅުން 85 އަހަރުގައި އުމަރު ޒާހިރު މިއަދު އަވަހާރަވީ ކޮވިޑް-19ގެ އާލާސްކަންފުޅުގައި ދަރުމަވަންތަ ހޮސްޕިޓަލުގައި ފަރުވާހޯއްދަވަމުން ގެންދަވަނިކޮށެވެ.
ސަރުކާރުގެ އެކި ފަންތީގެ އެކި މަގާމުތައް ފުރުއްވުމުގައި އެމަނިކުފާނު 1953އިން ފެށިގެން 2008ވަނަ އަހަރާހަމައަށް ދެމިހުންނެވިއެވެ. ހޯމް މިނިސްޓަރު، ރައީސް އޮފީހުގެ ސީނިއާ މިނިސްޓަރުކަމުގެ އިތުރުން އެމަނިކުފާނަކީ ރައްޔިތުންގެ ހާއްސަ މަޖިލީހުގެ މެމްބަރުކަންވެސް ކުރެއްވި ބޭފުޅެކެވެ. މާލޭގެ ތަރައްގީގެ ބޮޑެތި ހުރިހާ މަސައްކަތްތަކާއި، އަތޮޅުތެރޭގެ ތަރައްގީގެ ގިނަ މަސައްކަތެއްގެވެސް މޭސްތިރިއަކީ އުމަރު ޒާހިރެވެ. އެމަނިކުފާނަށް ނިޝާން އިއްޒުއްދީންގެ އިއްޒަތުގެ ލަގަބު ލިބިވަޑައިގެންނެވީ 2008 ވަނަ އަހަރުއެވެ.
