މެއި މަހުގެ 6 ވަނަ ދުވަހު، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަަވަހާރަކޮށްލަން ދިން ބޮމުގެ ހަމަލާގައި އަމަލީގޮތުން ބައިވެރިވި އަހްމަދު އަދުހަމް ރަޝީދަށް އިއްވި ހުކުމުން ހާމަވަނީ ކޯޓަށް ހުށަހެޅުނު ހެކިތަކުގެ ވަރުގަދަކަން ކަމަށް އެ ތަހުގީގު ގާތުން ބެއްލެވުމަށްޓަކައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް އައްޔަންކުރައްވާފައިވާ ހާއްސަ މަންދޫބު، އައްބާސް ފާއިޒް ވިދާޅުއްޖެއެވެ.
މިއަދުގެ ޝަރީއަތުގައި އަދުހަމްގެ މައްޗަށް ވަނީ 23 އަހަރުގެ ޖަލު ހުކުމެއް އިއްވާފައެވެ.
މިކަމާ ގުޅޭގޮތުން އައްބާސް ކުރެއްވި ޓުވީޓެއްގައި ވިދާޅުވީ ހަމަލާދިން މީހުންގެ ތެރެއިން އެކަކުގެ މައްޗަށް މިއަދު ހުކުމް އިއްވުމަކީ ކޯޓަށް ހުށަހެޅިފައިވާ ހެކިތަކުގެ ވަރުގަދަކަން ހާމަވާ ކަމެއް ކަމަށެވެ. އަދި މިއީ ފުލުހުން ޕްރޮފެޝަނަލްކޮށް ހޯދައި، ޕީޖީ އޮފީހުން ދިރާސާކޮށް ހުށަހެޅި ހެކިތަކުގެ ވަރުގަދަކަން ދައްކުވައިދޭ ކަމެއް ކަމަށެވެ.
Today's sentencing of one of the May 6 attackers is testimony to the strength of evidence presented to the court - professionally gathered by the policie, meticulously scrutinized by the prosecution. However, this must not overshadow pending work to uncover wider links & fiances.
— Abbas Faiz (@tweetafaiz) December 14, 2021
މީގެއިތުރުން، އަދުހަމްގެ މައްޗަށް ހުކުމް އިއްވުމުގެ ސަބަބުން މި ހަމަލާއާއި ގުޅުން ހުރި އިތުރު ގުޅުންތަކާއި ހަމަލާއަށް ފަންޑު ކުރި މީހުން ހޯދަން ކުރާ މަސައްކަތަށް ހިޔަނި އެޅިގެން ނުވާނެ ކަމަށް ވެސް ވިދާޅުވިއެވެ.
މިއަދުގެ އަޑުއެހުމުގައި އަދުހަމް ވަނީ، ކުށްކުރެވުނީ ދީނީ ގޮތުން ގަބޫލުކުރެވިފައިވާ ގަބޫލުކުރެވުންތަކެއްގެ ސަބަބުން ކަމަށް ބުނެ އެ ކަމަށްޓަކައި ރައީސް ނަޝީދާއި އެ ހަމަލާގައި ޒަހަމްވި އެންމެންގެ ކިބައިން މައާފަށް އެދިފައެވެ.
