ފާއިތުވި 48 ގަޑިއިރު ތެރޭގައި ފުލުހުން ހިންގި އޮޕަރޭޝަންތަކުން 119 ކިލޯގެ މަސްތުވާތަކެތި އަތުލައިގަނެފައިވާ ކަމަށް ފުލުހުންގެ ކޮމިޝަނަރ މުހައްމަދު ހަމީދު ވިދާޅުވެއްޖެއެވެ.
ސީޕީ ކުރެއްވި ޓުވީޓެއްގައި ވިދާޅުވީ މިދިޔަ 48 ގަޑިއިރު ތެރޭގައި ފުލުހުން ކުރި މަސައްކަތުން ހެރޮއިން ކަމަށް ޝައްކު ކުރެވޭ 91 ޕެކެޓު ހޯދާފައިވާ ކަމަށެވެ. އަދި އާދީއްތަ ދުވަހު އަތުލައިގަތް 28 ޕެކެޓާއި އެކު ޖުމްލަ 119 ޕެކެޓު ހޯދިފައިވާ ކަމަށް ވެސް ވިދާޅުވިއެވެ. މި ތަކެތީގެ ބަރުދަނުގައި 119 ކިލޯ ހުންނާނެ ކަމަށް ސީޕީ ވަނީ ލަފާކުރައްވާފައެވެ.
Our teams have successfully recovered additional 91 packets of narcotic drugs that are suspected to be heroin after really good policing work during the last 48 hours. This makes it a total of 119 packets with the 28 packets seized on Sunday night. Estimated weight is 119 kgs. pic.twitter.com/oDOUxWre4w
— Mohamed Hameed (@M_Hameedh) December 14, 2021
އާދީއްތަ ދުވަހުގެ ރޭ ހިންގި އޮޕަރޭޝަންގައި ފުލުހުން ވަނީ ލޯންޗަކާއި ޓެކްސީ އެއް ބަލައިފާސް ކޮށްފައެވެ. ލޯންޗުން ބަނގުރާ ފުޅިތަކެއް ހުރި 12 ފޮށިގަނޑު ފެނުނުއިރު ޓެކްސީ އިން ބަނގުރާ ފުޅިތަކެއް ހުރި ތިން ފޮށި ގަނޑު ފެނިފައިވެއެވެ.
މި މައްސަލައިގައި 24 އަހަރުގެ ފިރިހެނަކާއި 25 އަހަރުގެ ފިރިހެނަކާއި 22 އަހަރުގެ ފިރިހެނަކާއި 38 އަހަރުގެ ފިރިހެނެއްގެ އިތުރުން 51 އަހަރުގެ ފިރިހެނެއް ހައްޔަރުކުރިއެވެ. މިމީހުންގެ ތެރެއިން 51 އަހަރުގެ މީހާއަކީ ބަނގްލަދޭޝް ފިރިހެނެކެވެ. ދެން ތިބި ހަތަރު މީހުންނަކީ ދިވެހިންނެވެ.
